قسمة ونصيب

نصيب ......قسمة ونصيب.......الحب ده يبني زي حدف الطوب ما حدش بيختار الزلطة اللي بتفتح دماغه........انا عندي سؤال عن السبب المنطقي اللي بيخلينا نختار الشخص ده بالذات اللي بيتفتح بيه دماغنا....واشمعني ده بالذات وليه نخليه هو الاساس اللي بنبني عليه احلامنا للمستقبل.......ناس كتير قبلي فكرت ف سبب منطقي وف النهاية ما لقوش سبب........فقامت الدنيا كلها اتفقت علي ان الاختيار ده لا يخضع لاي اختيار وان الصدفة فيه اكبر من اي قواعد ....وان الحب والجواز وطوبة شريك الحياة اللي بتفتح لا مؤاخذة دماغ سعادتك مالهاش تفسير غير النصيب
لو انت ماشي ف الشارع وعيل صغير رخم نشك بطوبة جت ف دماغك الكلام اللي هتسمعه من الناس كالاّتي:خلاص بقي يا بش مهندس قدر ولطف والحمد لله انها جت علي قد كده............ خلاص ياسيدنا بقي جت سليمة المرة دي روح بس احبسها بشوية بن وانت هتبقي زي الفل.....يمكن هو ده الفرق الوحيد بين الحب وحدف الطوب .....حدف الطوف نزفه ممكن توقفه باي حاجة ان شالله حتي حبة بن كنت هتعمل بيهم فنجان قهوة عشان تعمل دماغ علي كل حال كده ولا كده هتعمل دماغ ما انت هتحطه علي دماغك.......اما الحب فنزفه بيفضل مفتوح طول العمروما ينفعش ابدا ان انت تكبسها بشوية بن
اللي يغيظك بقي ان ممكن عيل يحدفك بالطوبة فتعرف انت تتفاداها بسرعة....... اما الحب فانت كده كده مش هتعرف تتفادي بطحته.....ليه ؟؟؟؟.....لان ببساطة حكم الهوي ماشي وانت ما تدراشي
احيانا في ناس بتتخيل انها اختارت حد لانه يبقي الحبيب المنتظر وتلاقي اي عبيط منهم بقي يقولك العقل له دخل ف قراري وانا بحب بعقلي والهرتلة الساقطة اللي احنا عارفينها دي
هتبقي مصيبة كبيرة لو كان الحب بيحصل باختيار عقلي مدروس......كنا ممكن كلنا نروح ف دهية....ببساطة يا جماعة لان كل الولاد كانت كل اختياراتهم هتصب في اقل من واحد ف المية من البنات اللي موجودة ف الدنيا عشان هما البنات الحلوين او هما المطابقين للمواصفات العقلية المطلوبة....وطبعا كان كل البنات هينشنوا علي براد بيت جورج كلوني روسل كرو او حتي مهند ابو دقن بني محمرة........اما باقي البنات والولاد اللي لسه ما لاقوش اختياراتهم كانو هيكتفو بالفرجة علي عمليات التزاوج اللي بتحصل ويرفضو التزاوج لانهم مالقوش المواصفات اللي هما عايزينها
ولذلك القدر والنصيب هما اللي تولوا عملية التوزيع العادل للحب والزواج ....وبالتالي كل راجل وكل ست هتبقي قدامه الفرصة مفتوحة حتي لو كان اغبي راجل ف الدنيا او ارخم واحد ف الكون حتي لو كانت البنت اوحش بنت ف الوجود او اغبي بنت ف الدنيا ........كله هياخد فرصته ما دامت ضربات القدر هيا اللي بتوزع

والله يا دكتور ايمن ده اول توبك اقراه بس والله العظيم جااااااااااامد
رمضان كريم يا دكتور

الحب ده يبني زي حدف الطوب ما حدش بيختار الزلطة اللي بتفتح دماغه



هههههههههههههههه


جامده يسلام ع الحكم

ميرسي بجد علي ردودكم وكل سنة وانتم طيبين