لما حد بيحب حد اوي ويأذيه من غير ما ياخد باله (كما يدعي هذا الشخص المؤذي انه ما خدش باله)..........الناس بيقولو ان هو عمل زي الدبة اللي قتلت صاحبها
قصة الدبة اللي حبت تهش الدبان من علي وش صاحبها النايم فقتلته قصة مشهورة اوي
بس يا تري الدبة هيا اللي غشيمة ولا صاحبها هو اللي غبي
علي افضل الاحوال هنقول ان صاحبها هو اللي غبي لان ما فيش حد ذكي اساسا يصاحب دبة
لكن لو فكرنا شوية هنلاقي كام سؤال مهم
هل الدبة كان قصدها تهش الدبان فعلا من علي وش صاحبها.....؟؟؟؟؟؟؟؟؟؟.... ولا شافت ان دي حجة كويسة عشان تخلص منه وكمان بالمرة مفيش حد هيقدر يحاسبها......؟؟؟؟؟؟؟؟........ لأ وايه كمان هتتخلد ذكراها ف قصة تتوارثها الاجيال
تقريبا ما حدش هيقدر يجاوب ع السؤال ده لان صعب جدا حد يعرف الدبة بتفكر ازاي
لكن الاكيد ان فيه بشر كتير اتعلموا من القصة دي حاجات مهمة جدا
اتعلموا ازاي يجرحوا وازاي يقتلوا وفي الاخر يتقال عليهم معذورين......... عشان هما عملوا كده عن حب وكان قصدهم خير.............. وعشان فصول المأساة تكتمل، المجروح يتنسي واللي جرحه الناس تفتكره بالخير.........
شوف أزاي..............؟
ينسو الراجل اللي مات ويفتكرو الدبة اللي قتلته
لكن المصيبة الاكبر بقي ان فيه نوع من الناس اتعلموا من نوع تاني من الحكاوي اللي بتتقال علي الحيوانات
اتعلموا من حكاية القطة اللي بتاكل عيالها لما بتخاف عليهم ازاي لما يجرحوا ويقتلوا.... الناس مش بس تعذرهم
.....لأ وتعتبرهم أبطال كمان
اتعلمو ازاي يظهروا بشكل الابطال ويلبسوا قناع الشهداء وده القناع الوحيد اللي ممكن يبرر أي حاجة تعملها حتي لو كانت انك تاكل........ (بكل ما تحمله كلمة تاكل من معاني) اقرب الناس ليك
لو تعرف حد فيه من الدببة اوعي تنام قدامه لانك ممكن ما تصحاش تاني
ولو تعرف حد مدي علي سلوك القطط اوعي تصاحبه اوي او تحبه لانه هياكلك ويتغذي عليك وف الاخر الناس هتقول عليه مخلص
اهداء الي كل قطة أخفت عن حبيبها أنيابها......حتي اذا قتلته اعتذرت وأبدت أسبابها
الجمعة يناير 31, 2014 11:04 am من طرف سفير الودّ
موضوع: الدبة التي قتلت صاحبها 
