انا كنت مرة قلت ان عماد متعب ما ينفعش يلعب في ماتش الجزائر ومصر
نظرا لعدم استعداده بدنيا ونفسيا بعد الاصابة الطويلة اللي كان بيعاني منها
وفعلا كان نزوله في ماتش خطير زي ده مخاطرة كبيرة جدا من حسن شحاتة
بعدم الفوز في هذه المباراة
في الحقيقة انا كنت من اشد المعترضين علي نزول حبيب ابوه في الماتش ده
وانا مسميه حبيب ابوه نظرا للعلاقة الحميمة اللي بينه وبين الوحش حسن شحاته
ولما متعب نزل قلت خلاص احنا كده خسرنا الماتش
بس عمده ما سكتش واثبت نفسه
ولذلك كان لازم اعتذرله
ومش انا لوحدي اللي عايز اعتذرله
انا كل الناس جنبي في المدرجات كانت رافضة نزوله الملعب
ولما عمده نزل بدأت الشتائم تصب علي راس حسن شحاته وابنه اللي هو متعب يعني
بس مش عايز اقولكم لما حبيب ابوه جاب الجون الناس ف المدرجات كانت عاملة ازاي
وكانو ازاي بيهتفو باسمه
الصفة بتاعتنا احنا كنا بنادي باسمه لحد ما الماتش خلص وبعد الماتش كمان
الناس امبارح في مصر كانت مش طبيعية
وكان في تجمعات كتيرة امبارح في كل حتة في مصر وبالاخص
مدينة نصر
المهندسين
وبالذات شارع جامعة الدول
انا كان نفسي يبقي معايا طيارة عشان اشوف كل التجمعات دي
بس للاسف من كتر الزحمة ما كانش في مكان الواحد يتحرك فيه
احنا طلعنا من الاستاد بالعافية بعد الماتش بساعتين
الغريبة اني لما وصلت المنيل تقريبا الساعة تلاتة ونص الفجر ودي المنطقة اللي انا قاعد فيها
لقيت الناس لسه في الشوارع بترقص وبتغني وموقفين العربيات وموقفين حركة المرور خالص علي كوبري الجامعة وشارع المنيل الرئيسي
رجالة وستات وبنات وشباب
كله بيهتف باسم مصر
من اجمل الايام اللي عيشتها في حياتي بجد كان يوم السبت
مصر والجزائر
واخيرا انا اسف جدا يا بو شحاته وانت كمان يا حبيب ابوك
وعلي راي المثل
(يوضع سره في أتعب خلقه)